"اوختای" ین شعری، "محمد رحمانی فر" ین آچیقلاماسی

یازار : رضا صيامي

+0 به یه ندیم / پسندیدم

"سن بو شعرلری بیر گوزگو كیمی سان! بیلیرسن گوزگونون اؤزونده هئچ بیر اوز یوخدور. آنجاق، هر كیمسه اونا باخسا، اوندا اؤز اوزونو گؤره بیلر. بونودا بیل شعرین اؤزونده هئچ بیر آنلام یوخدور. بونا باخمایاراق، هر كیمسه اوندا اؤز كئچمیشینی ها بئله اؤز گله جه یینی گؤره بیلر. دئسه ن شعرین آنلامی شاعیرین ایسته دییی آنلام دیر. باشقالاری ایسه اؤزلریندن اونا آنلام باغلاییرلار، ائله بیل بیریسی دئییر گوزگوده جانلانمیش اوز، ائله گوزگونون ایلكین اوزودور."

                                                                                         عین القضات میانجی(همدانی)[1]

-------

بو گونكو مطلبده "اوختای وطنخواه" ین بیر شعرینی اوخویوب و بو شعرین اوزرینده "محمد رحمانی فر" ین یوزومسال(هرمنوتیك) تنقید و آچیقلاماسینی دینله ییریك.[2]

 

بیر دیش تاخیلدی بو شعرین باشلانیشیندا

آنامین دیلینین اورتاسینا

بیر آلله سیز الی دیر،

گؤزومون آلتینی گؤوردن

یوموروق،شاپالاق

خیاوان اوزرینده خط لر

 ترافیك لامپالاریندا رنگ لره آلدانما

خط لر سون سوز

لامپالارا تك لیكده باخان اولمور

ائله بودور

گئجه لرینده قوخویور آیاق لاریم

كوچه نین باشیندا دووارا دایانمیش

اللری دیزی اوستونده

نوستالژی یاریشینا گئدیر.

 

اوشاق لیقدا بازاردا ایتدیگیم گون

ایكی گؤز آردیمجا سورونوردو

گولوردو منه

قورخودوردو بازاردان

اؤزلوگومو ایتیرمك شرطی ایله

امانت آلدی اوره گیمی

دیرناغی چكیلن قیزدیر

ماهنی لاریمین ریتمین قاتان

 

كاریخدی ایتدیگی گون

اؤزگه چادیراسینین اته گینه یاپیشدی

ساتیلدی اوشاق لیقدا

بو گون لر نئچه "اوختای" یاراندی قارانلیق كوچه لرده

بیریسی هامیدان آجیقلی اولار

بیریسی گونده نئچه سینه وورولار

بیریسی حامامدا ائولادینی سویا قوشار

سن بونلارا فیكیرلشمه دن

ساری ساچلارینی هؤر!

 شعری و اونون آچیقلاماسینی دینله مك ایچون بورایا تیكلایین

-------

[1] شهریارلا بیرلیكده اؤزگه لشمه دن اؤزلشمه یه دوغرو، محمد رحمانی فر، نشر ملینا، قم ،1392، بیرینجی صحیفه

[2] سینیق رادیو، 48 نجی یایین، siniqradio.com