اؤزگه چیراغینا یاغ اولماق بسدیر - شعری كه باعث آفرینش سهندیه شهریار شد
یازار : رضا صيامي
+0 به یه ندیم / پسندیدم
اؤزگه چیراغینا یاغ اولماق بسدیر - شعری كه باعث آفرینش سهندیه شهریار شد
نامه منظوم بولود قاراچورلو "سهند" به شهریار كه در آن شهریار را از "روغن چراغ دیگران" شدن برحذر می دارد و از او می خواهد كه اگر قرار است بسوزند، برای ملت خود بسوزند. این نامه منظوم باعث آفرینش "سهندیه" شاهكار شهریار شد.
اؤزگه چیراغینا یاغ اولماق بسدیر
حؤرمتلی اوستاد، بؤیوك شهریارا
بیر الیمده قلم، بیر الده كاغاز
خیالیم بویلانیر دامدان، دوواردان
باشیمدا یار باغین گزمك هاواسی
قاپیلار باغلیدیر، یول تاپیم هاردان
حاصارین دالیندا كؤنول وئردییم
او یار بیر باغ سالیب، سویو بولوردان
هئیواسی كهروبا، ناری یاقوتدان
تاغی فیروزه دن، دیوانی گولدن
ماوی ائیوانیندا ساز چالیر زهره
بورجوندا یای چكیب، دایانیب كئیوان
لاییقی وار گیره م قصرینه من ده
قیللی پاپاغیملان، سینیق سازیملان؟
او بو ائحتیشاملا، بو طمطراقلا
قاپیسین اوزومه آچماسا نه وار
شاهلا رعییتین صحبتی توتماز
من بیر اوبالییام، اودور شهرییار
گره ك روخصت آلام حئیدربابا´دان
"یوخ" جاوابی بلكه منه وئرمه سین
بیر ده شهرییار´دان فرمانیم واردیر
"شاعیر بیر بیرینی اولور گرمه سین؟"
یوخ، من ده سهند′ه م، باشیم اوجادیر
ایچیمده سؤنمه یه ن عشق آتشی وار
منده صفاسی وار گوللو باهارین
باشیمی توتسا دا قارا بولودلار
لاله لی چیچكلی چمنلریمده
گلیب یورد سالسا دا چوبان-چولوقلار
یالواررام صفامدان اوز دؤنده رمه سین
شهرییارا لاییق "شاه یوردو"م دا وار
كؤنلوم هاواسییلا قول-قاناد آچیر
قاف قالاسین آلماق دئیه اوجالیر
قالخدیقجا بوی آتیر داش دووارلاردا
آلیجی ترلانیم یورولور، قالیر
دووارلار، دووارلار، پولاد اولساز دا
آلماز میشار اوللام، كسیب بیچه ره م
كولونگون بورج آللام فرهاد بابانین
بیسوتون اولساز دا، چاپیب گئچه ره م
دووارلار، دووارلار، یول وئرین گئچیم
وولقانام، نفسیم توفان قوپارار
بولودام، ساللانسا قاشیم-قاباغیم
آغلارام، عالمی سئللر آپارار
بیر الیمده اود وار، بیر الیمده سو
بیر اوزوم قاراقیش، بیری باهاردیر
دوستا، ایستی كلییه ایستی قوینوم وار
دوشمانا باخیشیم شاختادیر، قاردیر
ایچیمده بوغولور دادیم، هاراییم
نه دووار هاییما های وئریر، نه یار
نه داشدان سس چیخیر، نه ده قارداشدان
سانكی بوشلوقلاردا ایتیر دالقالار
بیلمیره م بلكه ده بو بیر خیالدیر
یا دا كی سئحردیر منی آلدادان
دئییرلر دیلبریم بولور قصرینده
داردادیر، آسیلیب تپه ساچیندان
سهندی قورخوتماز نه سارای، نه سئحیر
محببت دئییله ن بیر افسونوم وار
هم ایسم-ی اعظم دیر، هم ایسم-ی شب دیر
باغلی قاپیلاری اوزومه آچار
آچیلین، آچیلین باغلی قاپیلار
محببت نامینه، ایسته ك نامینه
ارییین، تؤكولون دمیر قیفیللار
كؤنول خاطیرینه، اوره ك نامینه
گلیر قولاغیما اینیلتیلری
بوردا بیر شئر داردا قالیب باغیریر
دوغرودان دا من بیر "مورووتسیز"ه م
قارداشیم داردادیر، منی چاغیریر
چكیلین، چكیلین، یول وئرین گئچیم
اوره ییم آلیشیب، آلوو ساچارام
شهرییار بوینونا زنجیر وورالار
چئینه ره م، گمیرره م، دارتیب آچارام
ایشله ییر قولوما دمیر پاخلالار
زنجیر قیجیقدیریر، سانجیر اتیمی
جان قارداش، هله لیك باغیشلا منی
دئیه سه ن اونوتدون اسارتیمی
عزیز شهرییاریم، باغیشلا منی
اینجیمه، داریلما، فیكرین هاردادیر؟
مورووتسیز دئییل سنین قارداشین
آنجاق سنین كیمی او دا داردادیر
اؤزؤن دئمه دین كی بیزیم ائللرده
وكیل مووككیلین خرجینی چكه ر،
آنا عشق اوجاغی سؤنمه سین دئیه
اوره ین اریده ر، چیراغا تؤكه ر؟
هر یانی بیلمیره م، بیزیم دییاردا
هئچ ده خیال دئییل، دوستلوق، محببت
آنجاق ایشیق ساچان ایستی گونش ده
بعضن بولود آلتدا گیزله نر، البت
نه بیلیم بلكه ده سولطانیم قارداش
ایشین عئیبی بیزیم اؤزوموزده دیر
همین بو ایلقارین دوشگونویوك بیز
گوناه یاددا دئییل، گوناه بیزده دیر
بیر اوووج كلكباز، قومارباز ایله ن
پاكباز اولموشوق، پاك اوتوزموشوق
مرد ایكن، نامرده رحم ائیله میشیك
ایندی نامردلره محتاج اولموشوق
دولتلییه ساخسی لازیم اولاندا
ووروب سیندیرمیشیق اؤز كوزه میزی
چیخدیغیمیز قینی بینمه میشیك
بیز ائلی آتمیشیق، ائل آتیب بیزی
ائلیمیزه نه گون آغلامیشیق بیز؟
باغین شاختا ووروب، بوستانین یاریب
ائل بیزه نئیله سین، نه گون آغلاسین؟
آغزی اوچوقلاییب، دیلی باغلانیب
ایندی اولان اولوب، گئچدیلر گئچیب
جالانان سو بیر ده كوزه یه دولماز
دالدان آتیلان داش توپوغا دیر
گؤز یاشی تؤكمكله ن یارا ساغالماز
بو گون من سهند م، سن شهرییارسان
گل باشین اوجالداق قوجا تبریزین
بیر كره یادلارین داشینی آتاق
چكه ك قایغیسینی اؤز ائلیمیزین
وفاسیز گوللرین اوستوندن اوچاق
قوناق صداقتلی ائل قوجاغینا
سؤنمز عشقیمیزدن بیر پیوند سالاق
ائلین شاختا وورموش گول بوداغینا
شاعیریم، دونیانی نئجه گؤرورسن
دوز یئییب، دوز قابین سیندیرانلار وار
قدیر بیله ن یارا جان قوربان ائیله
قدیر بیلمه یه نه حئییفدیر ایلقار
اؤزگه چیراغینا یاغ اولماق بسدیر
دوغما ائللریمیز قارانلیقدادیر
یانیب، یاندیرمایاق یادین اوجاغین
ائویمیز سویوقدور، قیشدیر، شاختادیر
دئمیره م، یانمایاق آلوولانمایاق
یانماسین، نئیله سین یازیق پروانه؟
یانمایاق وفاسیز یارین اودونا
یاناق ائلیمیزه، یاناق وطنه!
بیر یئرده قالماقدان داریلدیق، اؤلدوك
دوغما یوردوموزو دولاناق، گزه ك
ائل ایله آغلایاق، ائل ایله گوله ك
اینجیمیزی وطن ساپینا دوزه ك!
او عزیز دییاردا، دوغما شهرده
شاعیری جوشدوران صحنه لر چوخ وار
نیسگیللری چوخدور دردلی تبریزین
بیری سن اؤزونسن، عزیز شهرییار!
بورج آلتیندا یاشاماق یاماندیر، قارداش
بورجلویوق، بورجلویوق هم من، هم ده سن
گؤر نه روزی گاردا، گؤر نه گونده دیر
شهرییار بسله ین بو ائل، بو وطن!
چكه ك شئعر توپون، هایدی، قارداشیم
سن حئیدر بابایا، من ده سهنده
شاعیرین سیلاحی نغمه دیر، سؤزدور
نغمه میز یاییلسین شهره، كنده
یازاق، هر میصراعیمیز بیر بایراق اولسون
حقیقت بایراغی، ظفر بایراغی
پارلاسین مایاق تك، یانسین چیراق تك
گله جك مایاغی، اومود چیراغی
ایندیلیك ضعیف بیر داملا اولساق دا
سوزوله ك، ییغیلاق، گؤل اولاق، آخاق
قاریشیق چایلارا، داشقین سولارا
دره لردن گئچه ك، دنیزه چاتاق
شیلتاق لپه لره قوشولاق، جوشاق
سوزه ك دالقالاردا سونالار كیمی
گون وورسون، یاغیشلی بولودا دنه ك
اوچاق، هاوالاناق دورنالار كیمی!
اسسین اوستوموزه سویوق كوله كلر
بوزاراق، توتولاق، قارالاق، یاغاق
سئل اولاق، آغنایاق اوجا داغلاردان
یئرلی قایالاری دیبیندن قازاق!
داغلاری قوپاراق، دره لر دولسون
كؤپوكلو سولاری جالایاق دوزه
یاشارسین قوروموش كوللاریم كؤكو
باهاری قایتاراق وطنیمیزه
چایلارا سد ووراق، ظولمه حد ووراق
حاقلارا تاپشیراق حاققی هر یئرده
قیسیر قومساللارا جومماسین سولار
زمیلر گؤز گؤیه تیكمه سین بیر ده
كسه ك عداوتین، كینه نین كؤكون
عشقدن یئنی بیر قورولوش قوراق
مینه ك شاهابلارا، ایلدیریملارا
گئده ك اولدوزلارا، گونشه قوناق
سحر بولاغینین آریداق گؤزون
ایشیقلار قایناسین، خارراخار آخسین
چیزینسین یالینجیق، چیلپاق مئشه لر
بو داغلار دؤشونه گول-چیچه ك تاخسین
سهند ده گول آچسین، حئیدربابا دا
اوزه رینده چادیر قورسون شهرییار
باخاق چیچك لنن یوردا، شئعر یازاق
شاعیر ده بختییار، شئعر ده بختییار!
شاعیریم، یوبانما، یولدادیر كروان
قولاق آس، دونیادا گؤر نه بیر سسدیر
باغرینی سیخماسین آتیلان توپلار
قیریلان زنجیردیر، سینان قفسدیر
-----------------
مطالب مرتبط:
